ဘုရားခန်းမှာ ထိုင်
အတွေးပေါင်းဆုံနဲ့ မျက်နှာချင်းဆိုင်ရင်း
အမှတ်မထင်
ကောင်းကင်ကို မော့ကြည့်တော့
ကျိုးတို့ကျဲတဲ ခေါင်မိုးကြားမှာ
လင်းနေတဲ့ လမင်းက
ပြီတီတီမျက်နှာနဲ့
ချိုကြည်စွာ ပြောင်ရီလို့
ကြယ်ကလေးတွေကလည်း
လှောင်ပြုံးတစ်ချက်နဲ့
ငါ့ဘ၀ကို
ဝေဖန်သုံးသပ်လို့ပေ့ါ....
သင်းတို့ မေ့နေကြသလော
အမေရှိရင် ပိုက်ဆံရှိတယ်ဆိုတဲ့စကားက
မေတ္တာတရားကနေ
ဆင့်ပွားခဲ့တာပါ
ဝင့်ကြွားစွာ တစ်ခုပြောပြမယ်
အမြင်မှန်ပေါ် ရပ်ကြည့်ရုံနဲ့
အမှန်ကို မြင်နိုင်ပါ့မလား......?
ကံကြမ္မာ အလိုက်လွဲတဲ့ပွဲမှာ
အဆောင်အယောင်မွဲနေပေမယ့်
အမေဆောက်ထားတဲ့ သည်တဲက
လေပြေမပြောနဲ့
မုန်တိုင်းတောင် မဝှေ့နိုင်ဘူး
မိုးပြိုလို့ မြေအက်
မီးတောင်တွေ ပေါက်ကွဲထွက်ပါစေအုံးတော့
အနှိုင်းမဲ့ မေတ္တာဖြင့်တည်သောတဲအိမ်
မိုးတိမ်တွေ ဘယ်လောက်ပြိုပြို
ငါ မငိုပါဘူး
ခေါင်မိုးက ယို
ထရံကာ လေခိုပေမယ့်
အမေအို လောင်းရိပ်တည်သ၍
မြင့်မိုရ်ထက် ကြီးမြတ်တဲ့အကာအကွယ်နဲ့
အရာအားလုံးဟာ
အခမ်းနားဆုံး
အနန္တပြည့်စုံတယ်.....။
အမေများသို့
ထာဝရ ဦးညွတ်လျှက်
သင်းကွဲငှက်
0 comments:
Post a Comment